بعث الفنان الشاب طه دسوقي للصحفيين والإعلاميين وأساتذة المهنة برسالة عبر حسابه الشخصي على موقع التواصل الاجتماعي “فيسبوك”، يتساءل فيها: لما أكون ماشي في الشارع أو بحضر مناسبة مالهاش علاقة بالشغل وألاقي حد بيصورني فيديو.. اتعامل معاه إنه صحفي ولا متحرش؟.
جاء ذلك بعد ساعات من حضوره جنازة الفنان الراحل سليمان عيد، والذي رحل عن عالمنا أمس بشكل مفاجئ.
وأعرب الكثيرون عن استيائهم الشديد من قيام البعض بتصوير الجنازة بشكل لا يليق، حيث تعرض البعض لنعش الفنان وقام بتصويره من أعلى ليظهر جثمان الفنان سليمان عيد أثناء حمله، إضافة إلى حالة الزحام الشديد التي يتسبب فيها مصوريين الفيديو أمام المساجد ودور المناسبات لتصوير الفنانين والمشاهير أثناء تأدية واجبهم.
وكتب الفنان طه دسوقي عبر حسابه على فيسبوك:
مجرد سؤال
معروف إن الفنان أو العامل في مجال ال (show business ) بيبقى شغله انه بيقدم محتوى وهو الوحيد اللي يقدر يتكلم عنه ويتسأل فيه ويتقبل النقد اللي عليه .. فمفهوم وجود التغطية الإعلامية او التواجد الإعلامي في كل مراحل المحتوى ده .. سواء اثناء تصويره أو أثناء عرضه او أي حاجة تخصه زي المهرجانات وحفلات التكريم والعروض الخاصة .. من إمتى بقى أصبح الفنان “كبني ادم” هو نفسه محتوى ؟؟ .. يعني ليه فيه تغطية إعلامية ماشية مع الفنان ده في مناسباته الشخصية سواء بقى فرح أو عزا والأدهش حتى الدفنة!! وليه يبقى فيه محتوى عنوانه (شاهد فلان بيجوّز بنته.. فلان والدته توفت.. شاهد معازيم فرح فلان.. شاهد إنهيار الفنانة ) ليه والله ؟.
ليه شاهد الفنان وزوجته اثناء حضورهم فرح صديقه؟
ايه المحتوى في بني آدم ماشي في الشارع مع مراته او بيحضروا مناسبة ملهاش اي علاقة بفن ؟ إيه الصحافة في تصوير واحد قاعد بيبكي على حد فقده مش قاعد بيصور مشهد مثلا؟..
ايه السبق الصحفي في تصوير جثمان وليه أصلا تصوير جوه المقابر؟؟
طبعا مش كل حد رافع تليفونه بقى صحفي لأن الصحفيين المحترمين مبيعملوش كده
ده ياخدنا لسؤال تاني”معلش”
لو نزلت رفعت التليفون صورت واحد قاعد مع مراته على ترابيزة في مطعم هيقوم يكسر عضمك لأنك بالنسباله متحرش أو متطفل .. لكن لو اللي بيتصور ده فنان فاللي بيصوره -وارد يكون صحفي ياعم وانت راجل محبوب وسلم على جمهورك وإعملنا باي وانت بتاكل وقول لمراتك تعملنا باي كمان ولا انت مغرور ولا إيه ياعم من تواضع لله رفعه-
فسؤالي لأصحابي الصحفيين واساتذتي في مجال الصحافة والإعلام لما ابقى ماشي في الشارع او بحضر مناسبة ملهاش علاقة بالشغل والاقي حد بيصورني ڤيديو اتعامل معاه انه صحفي ولا متحرش؟
