يحرص موقع الصورة الحقيقية على تقديم خدمة أفضل للقراء والمتابعين، لذلك يقدم نصائحه لتجهيز شنطة الولادة لكل أم مصرية تستعد لاستقبال مولودها الجديد.
في أواخر شهور الحمل ومع اقتراب موعد الولادة تبدأ كل أم جديده في التفكير بتجهيز المنزل بكل ما يلزم المولود الجديد .
تجهيز شنطة الولادة
أولا علي الام الجديده تجهيز شنطتين شنطه فيها احتياجاتها الشخصية للولادة وشنطة لاحتياجات المولود.
مستلزمات شنطة الولادة
١- من أهم الأشياء في شنطة الولادة تواجد البطاقة الشخصية وأوراق التحاليل اللي هتكوني عاملاها خلال فترة الحمل و لو في أوراق للتأمين و لازم يكون معاكي رقم الدكتور اللي متابعه معاه حالتك من بداية الحمل أو لو في دكتور معين قررتي انك تولدي معاه
٢- مستلزمات الحمام زي الفوط الصحية و من أفضل الفوط الصحيه للولادة دراي بوست و لوتس و سوفي و هى مخصصه للولاده لنعومة ملمسها و حجمها الكبير كمان لازم تاخدي معاكي صابونه خاصه بيكي و شامبو و فوطة استحمام و مزيل عرق و فرشاة شعر و توك للشعر و كريم للشعر و مناديل ورقيه و مناديل مبلله و شبشب للحمام و فرشاة أسنان و معجون أسنان.
٣- لبس لبعد الولادة يكون فضفاض و بكميه مناسبه و يفضل يكون فضفاض من عند البطن بسبب وجود جرح الولاده لو هتولدي قيصري و يكون مريح ليكي و تقدري ترضعي منه كمان لازم تاخدي ملابس داخليه مناسبه بكميه مناسبه عشان لو اتبهدلت من دم الولاده تقدري تلبس مكانها ملابس داخليه نظيفه بحيث ماتضغطش عليكي في منطقة شق العجان لو هتولدي طبيعي و ساتر للرضاعه عشان لما تخرجي من المستشفى او لو حابه ترضعي و انتي لسه في المستشفى و في حد موجود جنبك
٤ – الموبايل و الشاحن و سماعات الأذن
٥- مشروبات دافيه زي اليانسون و الحلبه بالعسل الأسود عشان تساعد على زيادة كمية اللبن في صدر الأم و تحفز الرضاعة الطبيعية
كمان ممكن تاخدي معاكي في شنطة الولادة “كرة الولادة” لو بتشعرك بالراحة في حالة لو احتاجتيها عشان تساعدك على الولادة.
تحضير شنطة المولود والأشياء التي يحتاجها المولود وقت الولادة
١- لبس للبيبي ملابس داخليه مريحه سالوبيت داخلي كات او فانله كات و نص لو كانت الولاده في الصيف و طقم خارجي بكم خفيف و بنطلون داخلي و شراب و كوفيرته و اما لو كانت الولاده في الشتاء فاللبس هيكون كالأتي لبس داخلي كات و نص و كم سواء سالوبيت او فانله و ٢ بنطلون داخلي و طقم شتوي او سالوبيت شتوي و بطانيه او بورت و شراب و جوانتي و طقيه للرأس.
٢- الحفاضات الخاصه بالبيبي اللي حابه تستخدميها و يكون مقاسها مناسب لوزن البيبي عشان ماتسربش و مناديل مبلله للبيبي و شامبو و شاور جل للبيبي او صابونه بيبي و فوطه و زيت او لوشن لتدليك جسمه و كحول للسره و قطره لعينه و شفاط للمناخير و قصافه للأظافر لما ترجعي البيت بإذن الله.
اقرأ أيضًا:
