حلّ الكابتن مجدي عبد الغني ضيفا على برنامج “كلّم ربنا” مع أحمد الخطيب، المذاع عبر راديو 9090 خلال شهر رمضان 2024، متحدثا عن أصعب موقف تعرض له في حياته داخل النادي الأهلي.
وقال مجدي عبد الغني: أصعب موقف حصل معايا كان داخل النادي الأهلي، لما بلّغني أحد المُدربين بالإستغناء عني وقاللي أنت مش هتكون معانا، روح شوفلك نادي غير الأهلي.
ورفض مجدي عبد الغني ذكر اسم المدرب الذي أبلغه بذلك، مؤكدا أنه كان يريد تدميره وتدمير مستقبله الكروي، قائلا: ساعتها اكتشفت إن المُدرب ومجلس إدارة النادي الأهلي عاوزين يستغنوا عني في نهاية الموسم.. رحت للمُدرب أطلب منه آخد فرصتي وأحقق نفسي علشان اقدر أكمل، رد عليا رد قاسي واستفزني لدرجة إني انفعلت عليه وقلت له: انا مش همشي من النادي الاهلي مهما حصل وبكره هفكرك!.
وأضاف مجدي عبد الغني لبرنامج “كلّم ربنا” مع الإعلامي أحمد الخطيب: في الوقت ده بكيت لربنا وكلمته بدموعي ورفعت ايدي للسما قولتله : يارب ما تخذلني وما تكسفنيش .. انا بحب النادي الأهلي ونفسي أكمل فيه .. يارب تعيني على اني احقق حلمي وحلم أهلي وأسرتي.
وتابع: تخيل إن بعد كلامي ورجائي يشاء المولى عز وجل إن المُدرب ده يمشي ويبجي مكانه مدرب غيره، ولما شافني المدرب الجديد وسأل عني، وقال لى انت لعيب مميز ، ازاي كانوا عاوزين يمشوك؟، إنت هيكون لك شأن كبير في الأهلي وكرة القدم في مصر .. وبالفعل كملت في الأهلى وبقيت أحد أساطير الأهلي ومصر والحمدلله!.
وأردف قائلا: مش بس الموقف ده اللي كلمت فيه ربنا.. كان موقف ضربة الجزاء في ماتش مصر وهولندا بكأس العالم 1990 .. دي كانت لحظة عُمري كله وأكبر وأطول وأقسي لحظه أكلم فيها ربنا في حياتي .. أولا كنا رايحين البطولة ومش في دماغنا نهائيا نكون ند ومنافس لمنتخبات أوروبا، وفي ماتش هولندا لما حصلت المعجزة واتحسبت لنا ضربة جزاء لقينا نفسنا بنعمل أداء تاريخي، كل دا كان كويس لكنه كان بيصعّب عليا مهمة تسديد ضربة الجزاء، .. وانا رايح أسددها قلت لربنا كلام كتير جدا والناس فاكراني مرّكز في الشوطة لكن أنا كنت مركّز مع ربنا بناجيه وأطلب من الستر وقلتله : استرها معايا متخذلنيش ومتكسفنيش لأنه كان ممكن ينتهي مشواري كله لو ضاعت الضربة دي.. والحمد لله مناجاتي لربنا كان وراها استجابة كبيرة .. وضربة الجزاء دخلت!.
واختتم قائلا: أنا أول لاعب مسلم في العالم يسجد في ملاعب كرة القدم وأول لاعب مسلم يسجد في ملاعب أوروبا لما كنت بلعب في البرتغال .. أنا علّمت الناس كلها تسجد في الملاعب قبل أي حد، وقبل منتخب الساجدين وغيرهم .. تقدر تقول إني سنّيت سُنه حسنه وهي إني خلّيت كل اللعيبه تسجد لله شكرا في الملاعب.
