حلّت الإعلامية هبه الأباصيري ضيفة على برنامج “كلّم ربنا” المذاع عبر راديو 9090، ويقدمه الإعلامي أحمد الخطيب، متحدثة عن أصعب اللحظات التي مرت بها، وكيف تجاوزت المحن بعدما جلست في المنزل قرابة 3 سنوات دون عمل، لتقرر بعدها السفر لأداء العمرة وعرض شكواها على النبي صل الله عليه وسلّم.
تقول الإعلامية هبه الأباصيري: “كان حالي كويس والأمور ماشية، ومفيش مشاكل، لكن فجأة الدنيا اتبدّلت، ولقيت نفسي بدون عمل، وقعدت 3 سنين في البيت مفيش شغل بعد ما كنت ملئ السمع والبصر .. الدنيا ضاقت عليا أوي وأنا أم عندي بنات في رقبتي ومسئولة عنهم مسئولية كاملة وبيت وأسرة ومصاريف ومدارس والتزامات؟”.
وأضافت الإعلامية هبه الأباصيري في حديثها لبرنامج كلّم ربنا مع الإعلامي أحمد الخطيب: “٣ سنين بدون عمل رغم كوني إعلامية معروفة والناس كلها تعرفني، ووصل بيا الحال اني مكنتش قادرة أدفع مصاريف الكهربا والميه وبعت كل اللى له قيمة في حياتي عشان أعيش أنا وبناتي!، الدنيا ضاقت عليا من كل الاتجاهات وبدأت اشوف مدارس ارخص لأولادي ونعيش حالة تقشف صعبه أوي!”.
وتابعت: “وسط الغمامة دي لقيت نفسي بكلم ربنا واشتكي له .. كلمته بدموعي وقولتله ” انا مش ههون عليك .. بلاش تضيقها عليا اكتر من كدا .. افرجها عليا وعلي بناتي ملناش غيرك!”، مردفة: “اللحظة دي كانت لحظة تحول كبيرة لأني قررت كمان أروح عند سيدنا النبي واشتكي له”.
وقالت هبه الأباصيري: “استلفت فلوس السفر والعمرة، و رحت لدكتوري النفسي سيدنا النبي وزرته صل الله عليه وسلم، في الأول كان نفسي أدخل الروضة الشريفة علشان اشتكي عنده لأنه واسطتي وشفيعي وباب ربنا في قلبي.. وقفت على باب الروضة ومكنش معايا تصريح دخول وبقيت أدعي واقول يارب نفسي أدخل لحبيبي وحبيبك سيدنا النبي .. سبحان الله بعد ٥ دقايق كنت أول واحدة في الصف جوه الروضة رغم الزحام الشديد.. أول ما لقيت نفسي أمام سيدنا النبي بقيت أصرخ بعلو صوتي وأقوله: أنا متبهدلة يا سيدنا النبي .. متسيبنيش يا سيدنا النبي .. ودخلت في حالة انهيار من البكاء”.
واستطردت: “فجأة ارتحت وتوقفت عن البكاء ودخلت قلبي طمأنينة غير عادية وهدوووء نفسي محصلش معايا قبل كدا.. كأني خدت مُسكّن فوري!،، والله العظيم رجعت مصر وفي أول يوم جالي تليفون مهم .. لقيت التليفون المهم ده بيقولي الشغل في انتظارك ومضيت عقد عمل فورا .. واتفتح باب رزق من حيث لا أحتسب ، وديوني اتسددت وكان كرم كبير أوي أوي أوي من ربنا معرفش أوله ولا آخره”.
واختتمت الإعلامية هبه الأباصيري قائلة: كل ما الدنيا بتضيق عليا بكلم ربنا.. أومال أكلم مين غيره؟.. كل ما احب اكلّم ربنا افتح اذاعة القرآن الكريم واسمع كلامه ورسايل زي استبشري اصبري .. ربنا دا حبيبي وكتير أقوله أنا ما استاهلش النعم اللى انت بتنعم عليا بها .. ربنا كريم حتى في منعه.. بيمنع عني حاجات علشان رايد الخير ليا ويظهر لى الحكمة من وراها”.
