شهدت محافظة البحيرة، في مستهل أيام الدعاية الانتخابية لانتخابات مجلس الشيوخ، مؤتمرًا جماهيريًا حاشدًا نظمه حزب العدل لدعم مرشحه على المقعد الفردي عن دائرة البحيرة، الأستاذ محمد المصري.
حضر المؤتمر عدد من قيادات الحزب المركزية، مؤكدين على أهمية دور مجلس الشيوخ في التعبير عن قضايا المواطنين.
رئيس الحزب يدعو للمساءلة ويؤكد على دور مجلس الشيوخ
استهل المؤتمر بكلمة قوية ألقاها النائب عبد المنعم إمام، رئيس حزب العدل، الذي تحدث بصراحة عن الواقع الاقتصادي للمواطن.
وقال: “المؤتمر ده زيه اتعمل كتير، وجاتلكم وعود كتير من ناس قالوا هيجيبوا لبن العصفور، لكن الطريق اللي مشينا فيه من الزراعي لهنا بيقول عكس كده.. لا فيه عصفور ولا غيره.”
وأشار إمام إلى تدهور القوة الشرائية، موضحًا أنه “بالأرقام الرسمية، الحد الأدنى للأجور زاد من 1200 لـ6000 جنيه، لكن كان 150 دولار وبقى 128 دولار”. وتساءل: “كام واحد جه واتكلم عن أنين المواطن؟ عن شقى الناس؟ إذا كنا زي الفل، ليه لسه تعبانين؟ شعبنا ده بطل.. وقف جنب بلده في كل أزمة، ووقف جنب غزة لما الكل باعها.”
وشدد رئيس حزب العدل على الأهمية القصوى لمجلس الشيوخ، مؤكدًا أن “المجلس ده دوره مهم جدًا، المفروض يكون صوت الناس.. يسمع الفلاحين والعمال، ويطور السياسات اللي تتحول لقوانين تخدم الشعب.”
وحذر من اختيار غير الأكفاء، مشددًا على أن “المشورة دي وصية نبينا، لكن لو اخترنا ناس مش أكفاء، المشورة هتبقى فاسدة. لازم يكون المجلس ده مننا، من وسطنا، ويعبر عننا.”
محمد المصري: صوت من قلب الدائرة
وسط ترحيب كبير من أبناء دائرته، ألقى المرشح محمد المصري كلمته، مؤكدًا على التزامه بخدمة أهالي البحيرة: “بدأت من هنا.. من بلدي، لأنكم عارفيني وحافظيني، وعارفين مين محمد المصري. أنا مش جاي أقول وعود كبيرة، أنا جاي أكمل مشوار خدمتي ليكم، زي ما اتعودتوا عليا. هدفي أكون صوتكم في مجلس الشيوخ، صوت الفلاح، والعامل، والست البسيطة اللي عايزة تعليم وصحة وعدالة لأولادها.”
قيادات الحزب تؤكد على المبادئ الإصلاحية ودعم المرشحين
من جانبه، تحدث المهندس رضا أشرف، أمين حزب العدل بمحافظة البحيرة، عن دوافع انضمامه للحزب، قائلاً: “جئت لأحدثكم عن حزب العدل، وعن سبب انضمامي له. الحزب ده زي كفة الميزان.. بينتقد السيئ، لكنه دايمًا بيطرح البديل. زي موقفه في قانون الإيجار القديم. هو حزب إصلاحي حقيقي، قبل ما يعرض المشكلة، بيبحث عن حل. وده اللي حببني فيه، لأنه بيأمل الخير لمصر.”
وأكد المهندس إسماعيل الشرقاوي، نائب رئيس الحزب ومرشح “قائمة الشيوخ” عن محافظة الجيزة، على الدعم الكامل للحزب للمرشح محمد المصري، مشيدًا بتاريخه المشرف في العمل العام.
وفي ختام المؤتمر، ألقى الأستاذ معتز الشناوي، المتحدث الرسمي باسم الحزب، كلمة أكد فيها على البرنامج الانتخابي للحزب: “إحنا حزب العدل.. الصوت لما الدنيا بتحب تسكت. علشان كده حطينا برنامج انتخابي واضح، واقعي، ومدروس. برنامج بيشبهنا ويشبه حياتنا وأوجاعنا. بندعو لتعليم حقيقي، لمستشفيات نتعالج فيها بجد، ولعدالة اجتماعية مش شعارات.”
واختتم كلمته بدعوة المواطنين للمشاركة بوعي: “لو اخترتوا صح، هتحققوا الخير لبلدكم. علشان كده إحنا هنا، كل قيادات الحزب، علشان نقولكم: صوتكم بيفرق.. صوتكم يقدر يغير فعلاً.”
يهدف حزب العدل من خلال هذا المؤتمر إلى حشد الدعم لمرشحه محمد المصري، مؤكدًا على رؤيته لإصلاح الحياة التشريعية وخدمة قضايا المواطنين في مجلس الشيوخ.
