الانتخابات الرئاسية.. حل المرشح الرئاسي فريد زهران ضيفًا على برنامج كلمة أخيرة المُذاع عبر شاشة ON، وتُقدمه الإعلامية لميس الحديدي.
من رئيس وزراء حكومة فريد زهران؟
كشف المرشح الرئاسي فريد زهران عن المرشح لرئاسة وزراء حكومته في حال فوزه بمنصب رئيس الجمهورية.
وقال زهران إنه لم يحدد بعد حتى اللحظة اسم رئيس وزراء حكومته في حال فوزه بالانتخابات الرئاسية.
وبسؤاله هل: ممكن تبقي على الدكتور مدبولي مثلا لفترة انتقالية؟
قال فريد زهران: “معتقدش.. هو ليه سياسة مختلفة يا إما بينفذ بمنطق عبد المأمور وأنا أصلا رافض منطق إن رئيس الجمهورية هو يتحكم في السلطات.. رئيس الجمهورية هو الحكم بين السلطات وبيعطي مساحات لأجهزة المختلفة بما فيها مساحة السلطة التنفيذية.,. ويكون رئيس الوزراء حقيقي وعنده صلاحيات حقيقية”.
وبسؤاله عن هل تفكر في ترشيح اسم دكتور زياد بهاء الدين رئيسا للوزارء؟
أجاب المرشح الرئاسي فريد زهران قائلا: “ياريت.. لما تقوليلي مدبولي أقولك لا، زياد أه”.
فريد زهران: سأقوم بإلغاء بطاقات التموين خلال خمس سنوات
قال المرشح الرئاسي فريد زهران: “حال فوزي بالرئاسة سأقوم بإلغاء بطاقات التموين بعد إنعاش الاقتصاد خلال فترة 5 سنوات.
وأضاف: “طبعا.. الآن أنا معا دعم برامج الحماية الاجتماعية.. لكن الاستمرار في “برامج الحماية الاقتصادية معناها فشل الاقتصاد.. إنجلترا كان فيها برامج حماية اجتماعية أيام الحرب العالمية التانية.. لما خلصت الحرب والاقتصاد استعاد عافيته وبقى قوي معادش فيه ضرورة لبطاقة التموين.. الفكرة إني مش بعبد بطاقة التموين.. بالعكس الآن محتاجين برامج دعم الحماية الاجتماعية وزيادة السلع التموينية.. ”
وعقبت الحديدي قائلة: “لكن ده هيزود عجز الموازنة؟
ليرد: “زيادة الموارد المالية من البنود الأخرى اللي أنا بقولها، ممكنة.. إحنا معندناش مشكلة فلوس، عندنا مشكلة رب بيت بيروح كل يوم معاه 300 أو 400 جنيه، فهو وراجع يروح يتعشى مع أصحابه ويصرف منهم 200 ويدي لبيته 200 فطبعا هتبقى حالته كرب.. المشكلة بنصرف فلوسنا في إيه مش إننا معندناش فلوس.
كيف سيتعامل المرشح الرئاسي فريد زهران مع البرلمان الحالي وهل سيعين نائبا له حال فوزه؟
أجاب المرشح الرئاسي فريد زهران قائلًا: “البرلمان في مصر جزء رئيسي من مشكلته إن النواب عليهم ضغوط.. مش مطلقي السراح، لم يتم اختيارهم ولا إدارتهم بصورة ديمقراطية.. أنا في رأيي الشخصي إن تتم الانتخابات في مواعيدها والبرلمان يكمل.”
وقالت الإعلامية لميس الحديدي: “البرلمان ممكن يوقفلك حاجات كتيرة؟
وعقب المرشح الرئاسي فريد زهران قائلا: أكيد هيكمل مفيش حاجة تمنعه إنه يكمل، أنا بتكلم إزاي هتتعامل معاه، ممكن يجي واحد ميوافقش على حكومتك، وممكن يوقفلك قوانين.”
متابعاً: ” يسهل التعامل مع البرلمان الحالي بتركيبته الحالية مفيش مشكلة”.
ووجهت الحديدي سؤالا: الدستور بيقول إنك يجوز لك تعيين نائب رئيس، هل بتفكر في حد يكون نائب رئيس؟
ليرد: وارد بس مقولتش حد. بعينه ”
لتقاطعه الحديدي: مفيش وارد أكيد وأنت بتفكر بتحط ورقة للترشح هتقول هعمل كذا.
ليرد: “أنتي ليه متخيلة إني عندي إجابة ومخبيها عليكي”
وردت الحديدي: إزاي مفكرتش لا في رئيس وزراء ولا نائب رئيس ولا حكومة، ولا هتعمل إيه في البرلمان، كل ده مفكرتش فيه.؟
ليرد زهران: ” لا ينبغي أن نعبر النهر قبل الوصول إلى القنطرة.. إحنا في مراحل معينة من العمل، ومينفعش الناس تقعد تعمل مخطط في الهواء وهي لسه موصلتش للحظة اللي موصلتش ليها.
وعقبت الحديدي: ممكن أقولك إن دي مشكلة الأحزاب في مصر عموما.. الأحزاب في مصر بتقول إن فيه تضييق وده حقيقي لكنها لا تخطط للمستقبل وهو ده المشهد اللي قدامنا.
ليرد: “لا الأحزاب ممنوعة عن العمل والنشاط من سنة 54 رجعت للعمل والنشاط تاني في صورة منابر داخل الاتحاد الاشتراكي، والأحزاب محاصرة فيه تضييق عليها، وبالتالي مش في المستوى اللي أنتي بتأمليه.. اللي بتأمليه ده أنا بحاول أعمله، فيه فرق بين إني أشوفه مش معمول ف أعيط وبين إني أحاول أعمله.. وده اللي بحاول أعمله..
تسائل: ” هل إحنا كحزب كنا في قدر من الجاهزية وقت الترشح.. أكيد لا.. بس إيه ردنا على ده؟ بعض الناس اعترضت إننا مش جيدين بما يكفي.. لكن لو قعدنا ومتكلمناش مش هتحصل حاجة.. الانتخابات القادمة هيبقى الوضع أفضل وإحنا خضنا التجربة دي فبقينا أكثر استيعابا وقدرة والعملية بنائية.. بناء مجال سياسي في مصر والوصول لانتخابات نزيهة مثلى دي عملية تراكمية مقطعناش فيها شوط طويل”
مصر لا تحتاج لرئيس عسكري حتى لو كانت في حالة حرب
قال فريد زهران إن هناك بعض التساؤلات والمخاوف لدى الناس بشأن البديل، وأن هناك من لديه مخاوف على الأمن القومي وبالتالي يرى ان الرئيس العسكري مضمون أكتر وهناك من يسأل في حالة اختيار رئيس مدني هل القوات المسلحة هتتعاون معاه؟
وأضاف: “واذا حدث تغيير هل سيكون مضمون؟ ام سيكون هناك صراعات داخل السلطة تنتهي للانهيار؟ هذه كلها تخوفات لدى الناس اجاوب عليها”. مؤكداً انه لايوجد ما يستدعي ان يكون هناك رئيس من خلفية عسكرية حتى لو في حالة حرب..وانه والجيش المصري لم ينحاز أبدا ضد إرادة الشعب المصري وحينما انحاز الشعب المصري لإسقاط مبارك ومرسي ، انحاز الجيش للشعب المصري.
أتم: ” اذا انتخب الشعب المصري فريد زهران سينحاز الجيش لإرادة الشعب المصري فليس لدي اي تخوف من هذا
واضاف زهران” انا مش طارح أي خصومة مع أجهزة الدولة، وكتير من أجهزة السلطة في مصر قد ترى إن التغيير أكثر أمانا في المستقبل لأن الوضع في مصر يزاداد احتقان، والسخط يزداد والأزمة الاقتصادية تداعياتها أصبحت خطرة جدا، وقد يكون التغيير الآن أفضل من أن تتردى الأمور ويصبح معاه التغيير غير ممكن ، أنا أراهن وأمد يدي مش بس للمعارضة لكن حتى داخل أروقة الحكم لأني مش صاحب معركة صفرية مع حد”.
أولويات فريد زهران حال فوزه في الانتخابات الرئاسية
أكد المرشح الرئاسي فريد زهران انه اجندة اولوياته كمرشح للرئاسه تتضمن 5 ملفات وهي التعليم والصحة وبرامج الحماية الاجتماعية ودعم الزراعة ودعم برامج الصناعة.
وأضاف: “النظام الراهن لايرى هذا الكلام لان لدية أجندة تانية فيها كباري وأنفاق”، متابعًا: “لما بنتكلم على أي برامج بيترد علينا الفلوس منين؟.. أنا دايما ردي الفلوس بتتصرف إزاي؟ يعني من بضعة أسابيع رايحين البرلمان نقول عايزين 2 مليار دولار عشان القطار الكهربائي”.
واختتم حديثه قائلًا: “أنا معرفش مين هيركبه اللي هو من العين السخنة للعلمين طيب أنا بقول وفقا لأولويات مختلفة أوفر الفلوس بدلا من الدين باتنين مليار لو حتى يستعيد الاقتصاد المصري قوته”.
